الصديق اللي حروفي بدفتره

يـا صديق الـروح يا قلـبٍ سعـيد
......يالصديق اللي حـروفـي بـدفـّْتـرهْ

اكتب العـنوان ذكَّــرني الوعــيد
......وعــدك اللـي مـا هقيـتك تنــثره

جيـتك بمـرسال مـن قلـبٍ بليــد
......شــايـلٍ حبــك ونبـضـك يـذكــره

قلتها مـن قبـل يوم العـيد عــيد
......يوم كنت انـت الهنـا والمفـخره

يا حسـافه نظـرتي كانـت بعــيد
......كنت اظنـك خـط مثل المسطره

ما دريت ان الوجه رقعة حديد
......وبـالقـفـا فـارٍ تِخبــَّى بمجـحـره

الصحيح ان الخطأ نظم القصيد
......الليِّ مدحتك فيه ودايـم تـنشره

كنت اظـن الناس منـك تستـفيد
......كنـت اظـن الطيـب منـك محبره

وكنت اظنـك مثل دمِّي بالوريد
......يا خساره كيـف طيـبك تخـسره

الصداقه يا صديقي شي مجـيد
......لن صديقك جـاك لازم تحضـره

يوم فقرك كان قلبـك في رغيد
......ويوم جاك المال طيبك نعصره

ما هقـيت انـك بمـالك تسـتفيـد
......تالي عمرك يا صـديقي مقبـره

كنت قبل اليوم تسجع بالغـريد
......يوم كنـت الصـادق اللي نذكره

يا خـويِّيَ يا صــديقي يـا عتـيد
......ارجع لذاك الوقت ودربك عطـره

مالك قلوب العذارى ما يصيد
......ما يصيد الا الليِّ مثلك وانطره

واذكر الرحمن والحر الشديد
......واذكر النار اللي لهيبه تهدره

ما نـريد المال منـك والثـريـد
......ما نـريد الا الكسـرتـه تجـبره

ذاك ابوك صيته الدرَّ النضيد
......خالك اللي من صفاته عنتره

صيتهم عالي وممشاهم سديد
......ارجع لذاتــك ترى اصلك مفـخره

اقرا آي الله ذو العرش المجيد
......ولا تخلـي حول قبـرك مدبـره

النصيحه مني خذها واستفيد
......اذكر الله وذاك يوم المحشره

ان لفيت اليوم عاد العيد عيد
......وان غبت صارت سنينك مرمره